@ 
由中西區民政處同中西區青年網絡合辦、中西區青年發展及公民教育委員會，以及中西區青年社區建設委員會喺今年暑假協辦嘅 Paint My Dreams 繪畫藝術工作坊，已經圓滿結束啦！
今個暑假，一班年青人全情投入藝術世界，齊齊喺中環art studio上咗8堂繪畫班。透過細膩筆觸同七彩顏料我手繪我心，將自己心中所想所愛，以繪畫藝術形式呈現。學員嘗試咗一系列繪畫藝術創作，包括傳統中式水墨畫、塑膠彩畫、水彩畫、素描；亦有特色繪畫如酒精畫同鏡畫。佢哋仲突破紙張嘅界限，創作咗睇得又擺得嘅水托花同可愛招財貓添！
喺導師指導下，就算平時無特別接觸繪畫嘅朋友仔，都可以好快掌握繪圖同創作技巧，完成作品。有唔少學員仲約埋三五知己一齊上堂，傾吓偈、畫吓畫，一齊度過悠閒愉快充實嘅夏日時光！
