@ 
期待已久嘅輕鐵天榮站月台重置工程已經完成，並喺24/4正式揭幕啓用！元朗民政專員馬富威同港鐵公司車務營運及本地鐵路副總監李婉玲擔任主禮嘉賓，一齊主持紀念牌匾揭幕儀式 ，記錄呢個重要時刻！ 元朗區嘅區議員同埋一眾嘉賓除咗親臨見證 ，亦參觀咗天榮站嘅各項優化設施 ，仲齊齊坐埋列車，體驗輕鐵嘅全面服務。
為配合元朗區持續發展同提升鐵路服務質素 ，輕鐵天榮站進行咗月台重置工程，並分階段投入服務。而其中三個月台已於24/4正式啓用 。新天榮站優化咗月台布局 、增設咗無障礙設施 ，同時亦改善咗候車環境 ，為居民提供更安全、便捷同埋舒適嘅輕鐵服務 。另外，為方便市民返工返學，平日早上繁忙時段亦增設咗前往天水圍站嘅751P特別班次 ，讓市民出行更加方便快捷。
乘坐列車嘅元朗區議員對大家一齊努力嘅成果感到好開心 ，認為重新規劃後嘅車站布局更加清晰，優化後嘅設施令候車更舒適方便，為天水圍居民帶來更順暢嘅轉乘體驗 。 港鐵輕鐵大使「輕鐵妹妹」亦首次同公眾見面，而以「輕鐵妹妹」為主題嘅列車 同步亮相接載乘客，之後亦會行走各條輕鐵路線，為大家嘅旅程增添更多歡樂氣氛 。
元朗民政處同區議會將會繼續與港鐵保持緊密聯繫，著力於區內交通規劃同埋配套設施嘅發展，為建設更美好嘅元朗共同努力。
@ 
@