@ 
為咗方便港澳永久性居民當中嘅非中國籍居民往返內地，國家移民局早前推出《港澳居民來往內地通行證(非中國籍)》。呢個新措施方便在港嘅少數族裔朋友去內地旅遊，親身體驗中華文化！
有見及此，8月30日，元朗民政處同元朗大會堂少數族裔人士支援服務中心合辦、香港中旅集團協辦簡介會，幫助少數族裔人士了解有關非中國籍港澳居民申請來往內地通行證嘅手續。
活動喺元朗大會堂舉行。現場有香港中旅證件服務公司嘅代表向少數族裔街坊講解申請過程，並由少數族裔關愛隊嘅義工即場以烏都語及英語傳譯，讓出席嘅街坊了解詳情。
元朗民政專員胡天祐、立法會議員姚柏良、元朗區議會議員徐偉凱、元朗大會堂管理委員會副主席黃榮臻聯同香港中旅集團代表一齊參與簡單嘅儀式，鼓勵大家幫手宣傳，畀更多少數族裔朋友知道呢個新措施所帶來嘅便利！
@