@ 
為咗更深入掌握社區發展嘅脈搏，更好服務居民，九龍城民政專員兼區議會主席蔣志豪早前（14/4）帶領一眾區議員參觀地政總署嘅地理空間實驗室，同地政總署署長羅淦華進行深入交流。
交流會上，議員認真了解地政總署嘅日常工作同職責，並向署長反映地區嘅需要。議員仲親身試用咗地理空間實驗室入面嘅各項設施，認識空間數據共享平台嘅運作模式。大家都認為空間數據嘅各種創新應用，對九龍城嘅社區規劃同埋未來發展都能發揮重大作用，潛力無限。
另外，九龍城區議會最近一次嘅「流動會客室」已於25/4舉行，由區議員丁健華、吳寶強、黃文莉同埋賴彥宗輪值，喺馬頭角道街頭同街坊交流，並即時回應市民嘅查詢。下次嘅「流動會客室」將於30/5（星期六）喺港鐵啟德站A出口舉行，歡迎九龍城街坊過嚟同區議員交流互動。
除此之外，九龍城區議員尋日(28/4)亦參與食環署嘅「檢查大廈冷氣機以防滴水、改善社區環境啟動禮暨防治蟲鼠宣傳活動」。九龍城區環境衞生總監黃立人、九龍城民政處高級行政主任（地區管理）李志良、多位九龍城區議員，以及清潔龍阿德都到場支持，一齊提醒市民預防冷氣機滴水、保持環境衞生同防治蟲鼠嘅方法。大家要記得定期檢查同維修冷氣機，留意夏天蚊蟲滋生同預防鼠患！
