@ 
榮獲香港義工獎2024傑出青年義工計劃嘅大埔青網單車義工團，聯乘首次與政府部門義工隊合作嘅中銀國際義工隊，到長者中心與公公婆婆一同喜迎中秋！
大埔民政專員陳巧敏9月7日率領30多名大青同中銀國際義工，聯同人氣卡通奶龍，無懼風雨，以運動派送關愛，連結社區。
一眾義工先踩單車到大埔墟火車站及大埔工業邨收集本地製造商提供嘅飲品同點心，連同中銀國際義工隊熱心捐贈嘅月餅、水晶梨、楊桃，前往浸信會愛羣社會服務處大埔浸信會區張秀芳長者鄰舍中心，將愛心同祝福帶畀公公婆婆，再次展現大埔青網熱心服務社區嘅精神！
義工到長者中心同30幾位公公婆婆玩遊戲、猜燈謎，同佢哋傾偈唱歌仔。連奶龍都非常投入，手舞足蹈展示歌喉！義工與一班老友記提早歡度中秋佳節，並預祝大家中秋人月兩團圓。
@ 