@ 
9月8日，新娘潭路近烏蛟騰一幅25米x30米嘅斜坡發生山泥傾瀉，事發路段來回行車線封閉，經過各部門努力不懈清理，路段已經恢復通車！
消防當天上午接報後，立即派出搜救人員到場仔細搜索。土木工程拓展署嘅工程師就同一時間檢查斜坡。
消防經過仔細搜索確認無人被困後，路政署隨即派出工程人員同大型機械清理路面嘅沙泥；警方就喺現場疏導交通。
北區民政處工程組同承建商亦有出動，派出工人同器具，同路政署合作用最快速度清理路面。
此外，來往大埔同烏蛟騰嘅一條巴士線同一條綠van線因封路而中斷。為方便烏蛟騰嘅村民出入，安排咗來往粉嶺同鹿頸嘅綠van線加開特別班次去烏蛟騰接載村民。
而喺封路期間，北區沙打關愛隊都有到場了解情況同協助清理，仲持續向附近居民發放最新消息，令村民安心。
