@ 
「法治教育領袖培訓計劃」 進階課程第二擊 - 模擬法庭上個星期六正式登場。
今次律政司 搵咗個好有經驗嘅拍檔善導會同我哋一齊合作，我哋借咗已經交俾善導會進行活化嘅歷史建築 前北九龍裁判法院 進行今次嘅活動。
40多名學員上晝聽咗一場介紹刑事審訊唔同環節嘅講座。我哋好多謝兩位重量級講者：Vinci資深大律師 同埋高級檢控官 Kelvin，抽出寶貴嘅時間，同學員詳細講解刑事審訊嘅主要原則同意義，仲有證人嘅角色、控辯雙方律師嘅主問、盤問、覆問，開案同結案陳詞要注意嘅重點同技巧等等。
齋講啲程序同技巧可能都仲要啲想像力去諗，不如我哋就 dem 俾你睇啦。下晝，善導會嘅同事就親身上場，演繹一場涉及非禮案件嘅 #模擬審訊 ，等學員清楚觀察到模擬審訊嘅唔同環節。做咗多年檢控官 LEADOffice 嘅同事Michael亦搖身一變，扮演法官嘅角色，佢神情同語氣都入型入格呀！
齋睇 demo 都可能唔夠，不如就俾大家親身落場試下身手。學員之後分組喺小組導師嘅帶領下，分析案件嘅細節，同埋分配各自喺模擬審訊嘅角色。大家記得「培訓計劃」其中一個亮點係師資，喺我哋小組組長嗰度都充分體現㗎。10組嘅組長都係身經百戰嘅檢控官 或者私人執業大律師 ，個個至少有8年以上嘅經驗，學員可以近距離同各位組長交流，聽吓佢哋分享上庭嘅真實故事，真係獲益良多㗎。
做咗全日活動，啲學員都仲好精靈，問咗好多好精闢嘅問題，例如係陪審員嘅安排、証人供詞嘅處理等等。好多學員都意猶未盡，繼續捉住組長傾吓單case。 啱㗎啱㗎，上庭真係真係要做好多準備㗎。
期待學員喺嚟緊嘅兩個星期六，喺充滿歷史感、電影感嘅前北九龍裁判法院 Court 1嘅精彩庭審表現 ，好好享受一趟沉浸式嘅法治教育之旅！
