@ 
為促進種族和諧及社區共融，民政總署推出「地區為本種族融和計劃」，透過活動提升少數族裔參加者嘅能力，令佢哋更能融入社區。
由中西區民政處主辦及鄰舍輔導會融方少數族裔外展服務隊承辦嘅「中西區地區為本種族融和計劃 」已展開，將舉辦一系列多元活動，包括七人足球訓練班及友誼賽、本地文化導賞團、壓力舒緩工作坊及推廣少數族裔文化流動展覽等。
打頭陣嘅活動就係上個月舉行嘅「我們是領袖」訓練課程及電車遊覽。區內不同種族嘅青少年喺導師帶領下，透過互動遊戲及小組活動，輕鬆學習基本團隊領袖技巧。學員更參加咗電車遊覽團，用眼睛遊走區內多個歷史悠久嘅地標建築。
參加課程嘅青少年都表示，除咗學到成為領袖嘅基礎知識外，亦加深咗對中西區嘅認識，令佢哋更容易融入社區，而最重要當然就係透過課程認識到唔同族裔嘅新朋友。佢哋都希望可以學以致用，協助更多非華語人士融入社區。
