@ 
九龍城民政專員蔡敏君日前(14/9)同 位參與「Y-Dragon計劃」嘅中學生 ，參觀華潤創業旗下嘅華潤科學技術研究院同埋city’super超級市場 ，了解香港嘅最新創科發展 ，以及零售業支持可持續發展嘅措施。九龍城青年發展網絡顧問委員會同九龍城區青年發展及公民教育委員會均有代表陪同各位Y-Dragon一齊參觀。
第一站先去到位於香港科學園嘅華潤科學技術研究院參觀。首先出場嘅係新版沖咖啡機械人 ，見到佢可以按唔同嘅要求，喺咖啡上面打印圖案甚至拉花，創作出觀賞性極高嘅咖啡！其後了解智能養老按摩機嘅操作。呢部機器可以協助長者進行肩背舒緩、腿部拉筋等等嘅動作，減輕前線護理人員嘅負擔。各位Y-Dragon把握機會親身體驗，大家都對創科項目充滿好奇心！
參觀者們隨後返回九龍城區，參觀位於啟德AIRSIDE嘅city’super超級市場 。同學仔透過職員詳細嘅解說，認識零售百貨行業嘅運作模式之餘，仲了解各項支持可持續發展嘅措施，例如以回收材料製成嘅加厚紙袋取代塑膠袋 、售賣以可持續發展方式捕捉或養殖嘅海鮮 ，以及採用環保蜂巢紙取代氣泡膠膜保護易碎品等。整個過程讓各位Y-Dragon深刻明白到，小行動可以帶嚟大改變 ，大大提升對可持續發展嘅意識 。
九龍城民政處將繼續同社會各界合作 ，透過「Y-Dragon計劃」為青年人舉辦更多不同類型嘅活動，擴闊青年人視野 ，提升佢哋對可持續發展嘅認識同關注 ，一齊為人類嘅未來福祉出一分力 ！
@ 