@ 
一年容易又中秋，等記者深DUCK 同大家睇吓深水埗有咩活動，齊賀中秋佳節啦 ！
長沙灣海濱碼頭最新打卡秘境
嘩！️長沙灣海濱碼頭有隻大月兔啊！
深DUCK啱啱喺海濱見到碼頭有巨型打卡愛心裝置 、螢光燈帶同埋快閃出沒嘅兔子氣球啊！其中愛心裝置已錄得超過一萬人感應，激發出閃爍嘅心跳燈光啦。
除咗打卡裝置，今晚（17/9）中秋賞月夜仲有「海濱LIVE MUSIC全民音樂會」打響頭炮 ，畀街坊喺悠揚歌聲中歡度中秋 。屆時仲有彩繪、寵物打卡位等不同體驗等住大家 ～
展期為14/9-15/10，歡迎大家今晚帶埋屋企人、朋友 、毛孩 嚟海濱，同我哋玩燈籠食月餅 。
深DUCK仲收到消息 ，21-22/9喺碼頭一帶會有「假日維港臨海體驗市集」 ，到時有唔同特色商戶攤檔 、手工藝工作坊 、遊戲攤位 。大家可以一邊散步吹風 ，一邊感受特色市集嘅氛圍 ，到時見 ！
「躍動全港 - 一切由「深」出發」系列慶祝活動由深水埗居民聯會主辦，深水埗民政處、深水埗區議會及深水埗中南分區委員會協辦。
中秋節嚟深水埗Hea吓
適逢佳節，當然唔少得深水埗嘅品牌活動「Hea吓」系列啦 。
前日(15/9)喺一段基隆街設置咗唔少傳統慶中秋攤位，包括「花好月圓猜燈謎」 、「月滿中秋燈籠製作」 ，畀大家動動手腳同腦筋 。
深DUCK 喺現場見到街坊除咗享受親子時間之外，仲攬住國寶小熊貓同玉兔公仔打卡留念，仲有一家大細享用小食同飲品，輕鬆度過週末 。
活動由深水埗街坊福利事務促進會聯同深水埗區議會轄下社區參與及文化康樂委員會舉辦。
最後祝大家中秋團團圓圓、快快樂樂 ～
