@ 
南區區議會19/9召開第五次會議，議程豐富：
警民通力合作 共建安全家園
警務處處長蕭澤頤出席會議，與南區全體區議員會面交流。處長喺會上詳述警方預防同打擊罪案嘅工作，並提及增強市民防騙意識嘅重要性。南區區議會一向同警方合作無間，一眾區議員表示會繼續支持同全力配合警方嘅宣傳同執法工作。
善用地區空間 提振地區經濟
區議員同政府部門代表討論南區空置鋪位同非住宅設施嘅使用情況，探討點樣善用地方設施提升居民生活質素。無論係檔攤嘅種類同布局，抑或點樣善用空間促進青年發展同南區經濟發展都一一涉獵。經過一番討論，相關政府部門表示收到大家意見，將密切留意地區情況，適時推出優化措施 。
南區樂悠遊 處處有熊貓
市民深深喜愛大熊貓盈盈嘅一對龍鳯胎，同埋中央政府送贈嘅一對大熊貓。除咗慶賀南區增添四位國寶級成員外，適逢今年國慶75周年，南區區議會聯同南區民政處以及地區團體就推出一系列以熊貓為題嘅賀國慶活動！
首先，熊貓巴士會喺9-11月期間行走港島75號線；多艘傳統舢舨將化身熊貓綵艇喺29/9-1/10穿梭香港仔避風塘；多個南區人流熱點亦設大型LED熊貓天幕、燈飾，仲布置咗75隻活潑嘅熊貓畀大家「打打卡」；學生哥仲可以「筆尖繪夢」，參與熊貓主題繪畫比賽；區內商店亦推出各款可愛熊貓造型小食，畀大家大飽口福。南區吉祥物「樂雨」亦會化身熊貓飼養員，以不同形式現身多個熊貓主題慶祝活動，同大家一齊賀國慶！
會議更有討論南區三大特色旅遊路線——「古蹟漁港線」、「慢活優悠線」，同埋「文青風采線」，推介畀大家深度遊覽南區。各位巴士迷、攝影迷、行山友、熊貓迷，快啲嚟南區參觀各大小名勝、打打卡、支持地區經濟啦 !
