@ 
荃灣打卡地標 以「荃灣：時光交織」為題 ，荃灣民政處聯同荃灣區青年社區建設委員會設置咗共七組馬賽克藝術裝置。
第一組位於荃灣西樓角花園，以光柵馬賽克展示荃灣從古到今嘅多姿多彩面貌；其餘六組馬賽克拼貼就位於熙來攘往嘅大河道行人天橋，以不同主題串連成別具特色嘅步行「打卡」遊覽路線 ，呈現荃灣成為新巿鎮嘅演變歷程，為區內吸引人流之餘，亦為社區文化傳承作出貢獻。
其實荃灣打卡位又點止七組咁少呢？馬賽克藝術裝置係由數千張荃灣居民同地區人士提交嘅荃灣今昔景物照片組成 ，呢啲照片已成為馬賽克藝術裝置嘅一部分，集結咗荃灣美麗景觀同人文風情。遊人可以喺每個裝置前打卡，近距離咁了解荃灣不同景點，亦可回味舊時荃灣各式點滴。只要你放慢腳步，沿大河道行人天橋慢慢行，加起上嚟可以停留打卡嘅位置最少有30個啊 。
馬賽克藝術裝置啟動禮已經喺20/9順利舉行 ，主禮嘉賓包括民政總署署長張趙凱渝、荃灣民政專員區家盛，以及荃灣區青年社區建設委員會主席梁昌明，聯同近百位地區團體代表一同見證打卡地標嘅誕生 。
快啲叫埋親友嚟荃灣打卡啦！
@