@ 
黃大仙民政專員Thomas 今個周末出席咗青年及國慶活動 ，一齊重溫當中點滴啦 ！
1、香港航空職業及教育博覽2024
香港航天領袖總會一連兩日(21/9-22/9) 喺新蒲崗東華三院東蒲舉辦首屆「香港航空職業及教育博覽2024」 。今次係全港首個匯聚各個航空專業範疇（包括機師訓練、航空服務、飛機工程、飛機餐飲、地勤服務及航務管理）及結合航空教育與職涯規劃嘅博覽會 ，共邀請咗12個政府部門、航空機構及大專院校參加 。黃大仙民政處好高興能夠成為活動嘅策略夥伴 ，透過專題攤位 、模擬飛行體驗 、招聘諮詢及講座 ，為有志投身航空業嘅青年朋友提供多元化就業及進修資訊 ！
運輸及物流局局長林世雄、民政及青年事務局 Home and Youth Affairs Bureau副局長梁宏正、署理民航處處長黃嘉華、機場管理局主席林天福、中聯辦青年工作部二級巡視員張國來以及黃大仙民政專員Thomas尋日（21/9）出席開幕典禮 ，場面熱鬧 ！
雖然呢兩日落住大雨 ，但整個博覽嘅反應好好 ，有好多講座仲逼滿參加者 ，要安排企位添 ！
民政處會再接再厲 ，支持青年朋友生涯規劃，提供更多嘅資訊 。
2、「樂韻留聲賀國慶•古董音樂盒展覽會」啟動禮
為慶祝國慶75周年 ，黃大仙民政處聯同多個地區團體喺南蓮園池香海軒舉辦特色展覽會 ，展出70多組超過120至150年歷史嘅大型音樂盒 ！觀眾除咗可以近距離觀賞極珍貴嘅古董外 ，仲可以透過二維碼聽到每個音樂盒悠揚嘅音樂添 ！
民政總署署長張趙凱渝、中聯辦九龍工作部處長黃想平、九龍社團聯會理事長徐莉、黃大仙民政專員Thomas、多位立法會議員及地區領袖喺活動首日（21/9）主持啟動禮 。
展覽喺21/9-4/11期間舉行 ，歡迎公眾免費入場 。大家不妨約埋三五知己前來參與 ，並到黃大仙各處遊覽 ！
國慶將至 ，黃大仙民政處及地區團體將陸續有一連串慶祝活動 。祝願國家繼續富強昌盛、香港繁榮安定、家和萬事興 ！
@