@ 
葵青民政處聯同荃灣葵涌及青衣區中學校長會21/9喺長青社區會堂舉辦咗「葵青區華夏漢服設計及展示比賽」 ，增加青年對華夏服飾同傳統工藝嘅認識，推動中華文化 傳承，並培養新生代對國家嘅歸屬感同愛國精神。
活動主禮嘉賓包括葵青民政專員鄧顯權、教育局代表、葵青文藝協進會顧問黃兆雄、荃灣葵涌及青衣區中學校長會主席黃定康校長及副主席簡偉鴻校長、葵青區青年發展及公民教育委員會主席陳藹怡及副主席盧婉婷，以及葵青區青年社區建設委員會主席郭芙蓉。
葵青區內中學 嘅同學發揮無限創意 ，將不同漢服元素配搭，縫紉成優美典雅嘅漢服 。比賽當日，各參賽隊伍都喺大會特意為比賽設計嘅延伸舞台上走秀，向現場觀眾介紹參賽漢服嘅設計理念。作品每個細節，包括顏色 、用料 、圖案 ，都有歷史根據，別具心思。各個獲獎隊伍作品，無論喺妝容 、飾物 以及參賽漢服設計上，都係相得益彰，將華夏服飾特色同美感呈現得淋漓盡致，絕對實至名歸 。
葵青民政專員鄧顯權喺致辭時表示，高興見到青年一同參與推動中華文化嘅傳承，並鼓勵大家將優秀嘅華夏文化弘揚開去 。
除咗精彩走秀環節，大會仲邀請咗區內中學為觀眾帶嚟各項精彩絕倫嘅中國傳統表演，包括中樂團 、古箏獨奏，仲有平時比較少見嘅舞貔貅 ，觀眾都睇得好投入 。
@ 