@ 
騙徒手法層出不窮 ，為咗提高大家嘅防騙意識，各區民政處不時聯同警方、區議員、關愛隊、以及地區組織，透過唔同嘅渠道及宣傳活動，齊心協力將防騙訊息帶到社區、帶入千家萬戶。
例如新界南總區作為一個人口密集嘅地區，今年首5個月接獲嘅詐騙案件有近一半受害者報稱居住於公共屋邨內。葵青民政事務處早前就響應警方新界南總區推出嘅「安樂窩計劃」，由民政專員Huggin聯同葵青區區議員及關愛隊，與警方到區內屋邨進行家訪，向住戶講解防騙三式------ 不接聽！不輕信！不過數，仲幫公公婆婆安裝防騙手機程式 ，希望防騙信息唔止「入屋」，仲要「入腦」，集合各方力量，建立「零騙社區」。
大家都要時刻發揮關愛精神，提醒左鄰右里同長者，如果接到可疑來電或訊息，要分清真假，遇到懷疑，可以致電警方 「防騙易18222」，或者搵關愛隊同區議員幫手 。
