@ 
要做好地區服務，既要有發展願景，又要喺社區做細緻服務。一齊睇吓深水埗呢兩方面嘅工作。
1. 區議會參觀展城館
規劃署署長鍾文傑日前(10/10)邀請深水埗區議員參觀位於中環嘅展城館。
展城館係香港首個以城市規劃同大型基建發展為主題嘅展覽館，提供互動展覽體驗，以唔同空間數據同科技展出香港城市規劃喺過去、現在同未來嘅成就，有助啟發議員配合深水埗區未來嘅發展方向。
翻新咗嘅2樓展館主題為「建香港 見未來」，講述香港唔同嘅發展同基建項目，包括北部都會區、交椅洲人工島等，一眾區議員喺參觀後都對香港嘅規劃發展同基建有更深入嘅認識，更即席就深水埗嘅議題同署長交流意見。
2. 防火安全公眾教育
同晚，民政處聯同區議員梁秉堅及陳龍傑、消防處、防火安全委員會、關愛隊、少數族裔關愛隊、地區團體、大廈法團及物管代表一齊到訪福榮街嘅大廈，進行防火安全宣傳活動，等街坊更注意雜物阻塞走火通道所造成嘅消防安全隱患。
有大廈有唔少少數族裔居住。我哋特別預備七種不同語言嘅宣傳單張（包括中英文、烏都語、尼泊爾文、泰文、印尼文同埋菲律賓文），務求將訊息更全面地傳遞畀唔同嘅少數族裔人士。我地喺現場逐家逐戶提醒街坊要妥善清理通道嘅雜物，同埋保持大廈公共地方通道暢通。如住戶有需要，亦可以將家居垃圾、雜物棄置喺樓下食環署臨時設置嘅大型垃圾收集桶或食環署指定嘅地方，例如附近嘅元州街垃圾收集站。
保持大廈通道暢通整潔係大廈住戶嘅共同責任，等我地一齊締造一個舒適又安全嘅社區。
@ 