@ 
油尖旺又多一項富中國色彩嘅世界紀錄賀國慶！
油尖旺民政處今日同世界詠春文化交流聯合會以及人人為我、我為人人基金會，攜手創下最多人線上線下一齊打詠春嘅世界紀錄 。
活動主場喺榕樹頭公園，因為葉問師傅以前喺嗰度教詠春，而今日耍嘅「小念頭」套路，都係葉問師傅改名嘅。
近三百位參加者著住紅色功夫衫制服，喺油尖旺民政專員余健強響號後，喺榕樹頭同對面嘅梁顯利油麻地社區中心，整整齊齊一同耍拳超過五分鐘。
參加者由七歲到八十歲，有約一百名學生，大部分喺油尖旺讀書，練咗幾個月，做到零失誤創紀錄，大家同義工嘅努力沒有白費。
@