@ 
東區青藤計劃喺10月9-13日到訪韓國首爾市，進行為期5日4夜嘅「東區青藤 首爾文化體驗交流團」。
東區民政專員陳尚文擔任團長，聯同東區青年事務顧問廖錦興同鄭承峰，及東區青藤畢業生組織「藤絡」嘅一眾師兄師姐帶領學員體驗韓國傳統同埋現代流行文化。
一眾學員把握難得機會到中國駐韓國大使館參訪，與方坤代辦熱切交流，認識咗大使館嘅工作、中韓關係同發展潛質，仲參觀咗韓國嘅總統府青瓦台，了解韓國政治文化，大開眼界！
學員都去咗韓國首屈一指嘅首爾大學，由當地學生大使帶領參觀校園、交流兩地學習同青年文化，進一步了解韓國青年嘅生活方式。其他精彩嘅行程仲包括韓服及茶道體驗、Kpop舞蹈學習、韓式美容及專業形象體驗、韓式手沖咖啡文化體驗等等，學員都深深感受到韓國傳統及現代流行文化。
學員亦參觀咗現代汽車同KBS電視台，了解到韓國高科技製造業及傳播行業嘅現況，認識韓國人工智能發展及偶像經濟版塊情況。
學員喺行程最後一天分享咗喺交流團學習到嘅韓國青年生活、文化產業、教育同經濟發展。大家都收穫滿滿長知識。
