@ 
1.芬蘭青年交流團分享會
參加咗深水埗青年網絡「深青躍動」芬蘭交流團嘅同學日前(18/10)進行咗分享會。芬蘭人口比香港略少，喺創科方面亦有好多出色成就。同學分組就「企業、教育及行政機構」、「創科發展與文化保育」及「建築與風土民情」等匯報觀察所得，亦分享咗當地大學生及市民嘅日常生活。
有同學提及參觀赫爾辛基頌歌中央圖書館時，見到同香港圖書館嘅分別，亦有同學特別介紹喺KONE（通力電梯）嘅工廠及參觀Immersal公司時嘅體驗同得著，包括點樣運用空間數據技術，將AR、VR、MR等技術融入生活、文化及藝術，以至發展出客戶所需嘅服務！同學仲特別分享到訪中國駐芬蘭大使館以及芬蘭國會大廈嘅見聞，了解咗唔同地方行政機構嘅職責、權責同特色。
更有同學提出電梯公司嘅電子告示版其實可以用喺香港社區。而有出席活動嘅深水埗民政專員黃昕然就話，好快喺大埔道北河街隊道就真係會見到第一塊地區電子告示版，希望同學留意。
經過八日七夜嘅交流團，同學們喺個人成長同人際關係都有所得着。海外交流團係深水埗民政處每年嘅重點工作之一 ，希望畀機會區內基層青年出外探索，擴闊視野，了解不同地方嘅文化，從體驗中學習 。
2.3D深水埗360計劃 – 啟動禮
今年嘅3D深水埗360計劃，繼續用地理空間數據講好深水埗故事。
啟動禮19/10喺位於深水埗區嘅二級歷史建築 – 前北九龍裁判法院進行。學員都聚精會神聽浸大歷史系副教授鄺智文博士主講嘅「空間史研究初探」。
鄺博士以富趣味嘅角度令學員輕鬆掌握利用資訊科技同數據分析 去呈現歷史嘅技能。講座後大家就分組討論嚟緊研習報告想做嘅主題，分別創建同深水埗歷史相關又獨一無二嘅故事地圖(Story Map) 。
嚟緊學員仲會到圖書館搜集資料、到訪地理空間實驗室學習使用地理信息系統 (GIS) ，更深入探索有關香港嘅空間數據。最後各學員仲會喺成果分享會及結業禮當中向地區人士展示學習成果，真係好期待啊 ！
活動由深水埗民政處、深水埗區青年發展及公民教育委員會及香港中華文化促進中心合辦。深水埗民政專員黃昕然、深水埗區青年發展及公民教育委員會主席甄韋喬都有出席啟動禮，為學員打氣。
@ 