@ 
為慶祝國慶75周年，香港灣仔區各界協會10月12日舉辦咗制服團隊步操匯演暨嘉年華，以中式步操同攤位遊戲與區內居民歡賀國慶！
八隊由中小學生組成嘅青少年制服團隊，喺香港警務處灣仔警區嘅專業指導下，向大家展示鏗鏘有力嘅中式步操。佢哋精神抖擻，整齊劃一嘅步伐，舉手投足都散發自信，令在場市民都留下深刻印象。
民政總署署長張趙凱渝擔任檢閱官，致辭時表示好高興見到區內有咁多青年參與步操，充分展現大家嘅愛國情懷同對國民身分嘅認同。同場仲有超過60名幼稚園生參與活動，齊齊唱國歌，以及揮動國旗同區旗，同大家分享祖國成立75周年嘅歡欣。署長其後同可愛嘅小朋友影相同傾偈，佢哋紛紛表示好開心。
活動當日由署長、中聯辦港島工作部副部長王卉、香港灣仔區各界協會主席佘靜怡、首席永遠會長莊創業、連同立法會議員郭偉强及蘇長荣、灣仔區議員劉珮珊等出席支持活動及擔任主禮嘉賓。現場仲有十幾個地區團體參與攤位遊戲，畀一家大小參與其中，一同感受國慶喜悅。
