@ 
行政長官10月16日發表施政報告，肯定關愛隊對社區關愛嘅貢獻，嚟緊會將服務恆常化，繼續令市民受惠，感受到社會有愛。
南區關愛隊自成立以嚟一直非常積極地推行關愛工作，同各個地區團體緊密合作，好好善用地區資源。我哋關愛隊喺社區舉辦嘅關愛活動除咗多姿多彩外，無論係探訪居民定係為大家提供支援服務方面都係全程投入、做到最好，目的就係為咗增加南區居民嘅獲得感同埋幸福感。
南區民政專員、南區區議會主席兼南區關愛隊總指揮鄭港涌尋日10月17日出席由創美義工團、香港島各界聯合會南區地區委員會同埋石排灣居民協會舉辦嘅「南區愛心耆英義剪同樂日」，在場積極幫手嘅，當然唔少得關愛隊啦！
義剪活動今年已經係第21屆，免費為1000名長者剪髮，現場仲有歌舞表演及禮物派發。在場老友記都非常投入活動，同關愛隊義工興奮地傾個不停，佢哋仲讚關愛隊服務好熱心！
目前為止，全港452隊關愛隊已探訪合共約23萬長者戶同有需要住戶（即平均每隊509戶），提供超過2.2萬次簡單家居或其他各種支援（即平均每隊49次），而當中南區17隊關愛隊作出咗積極貢獻：
探訪超過14,000個長者戶及有需要住戶（即平均每隊824次），
提供超過1,500次簡單家居及其他各種支援（即平均每隊88次），
今年仲成為咗社會福利署嘅「支援長者及照顧者先導計劃」嘅先鋒隊，盡心盡力為大家服務。
除咗日常探訪同關心居民，喺緊急情況下關愛隊亦發揮重要角色，例如上年九月石澳喺暴雨期間大面積土地坍塌，陸路交通中斷，超過兩千名居民被困，關愛隊循水路為居民提供物資同緊急協助。
其實，區內只要有任何緊急事故，南區關愛隊每次都能夠靈活、迅速出勤，真正走在社區最前線。
南區17隊關愛隊會繼續做好地區工作，提升服務質素，秉持「民政幫到你」精神，為街坊排難解憂。
@ 
@