@ 
1/ 「斗耀香江 星輝南區——讚星禮斗祈福迎祥大法會」
嗇色園喺27/10走進南區，於黃竹坑舉行以75周年國慶為題嘅「讚星禮斗祈福迎祥大法會」，為香港祈福，保佑大家平安。
祈福活動由嗇色園、香港南區各界慶典委員會以及南區民政處合辦，亦係嗇色園第一次喺黃大仙以外嘅地區舉辦大型活動，意義確實非凡 。眾人齊齊到場支持，為儀式揭幕。同場加映仲有五顏六色嘅綵燈展。嘉賓喺開幕儀式後都抓緊機會打卡，部分嘉賓更同現場一班信眾、街坊朋友一齊參與法會儀式，包括「獻供科儀」以及「點燃牡丹燈」。
儀式最後，一眾人繞行綵燈陣，再踏上龍虎祈福橋，寓意我哋南區風調雨順，香港繁榮穩定，祖國國泰民安
除咗嗇色園嘅祈福活動外，南區喺27/10可以話係活動浪接浪，南區民政專員兼區議會主席鄭港涌更「朝10晚10」 為各盛事頻撲，心繫南區，連熊貓眼都出埋嚟。
2/ 南區地區康健中心兩周年 「健康世一嘉年華」
轉眼間，南區地區康健中心喺南區已經開展服務兩年啦！一眾嘉賓喺26/10嚟到「健康世一嘉年華」，齊齊慶祝中心兩周年同埋國慶75周年。當日節目豐富多元，包括表演、講座、攤位遊戲、健康諮詢服務、運動體驗專區同展覽等，以唔同形式宣傳中心嘅服務同自我健康管理嘅重要，吸引咗大量市民到訪。
3/ 「人人享健康 樂活在南區」閉幕頒獎禮
鄭專員喺27/10為 「人人享健康 樂活在南區」活動系列嘅閉幕禮同頒獎禮致辭及感謝主辦單位，活動系列讓超過7500名居民受惠，包括免費為街坊提供健康檢查、疫苗接種及專題醫療講座等。專員亦藉此向大家介紹南區美麗嘅自然風光，鼓勵大家放假到訪南區各處，享受一下悠閒時光，提升心理健康。
4/ 賀國慶防火宣傳教育日
薄扶林消防局27/10開放畀公眾，透過教育宣傳防火應急三識：即係「識滅火」、「識自救」同 「識逃生」三大範疇。小朋友仲一個個著住迷你制服，試試做迷你消防員同救護員嘅滋味。「任何仁」亦都喺現場教大家心肺復甦法同使用心臟除顫器。
5/ 粵藝文化賀國慶
南區文藝協進會亦喺27/10主辦南區粵藝文化活動，畀大家一齊探索戲曲藝術嘅世界。今年第四屆嘅活動更以75周年國慶為主題，深受老友記歡迎，佢哋除咗欣賞大家都熟悉嘅「篤篤篤撐」外，仲大讚演員嘅化妝同戲服都好靚好搶眼。
6/ 「香港非物質文化遺產」——天后寶誕
一眾嘉賓喺27/10晚上出席咗石澳村、大浪灣村、同埋鶴咀村為75周年國慶合力籌辦嘅「恭賀天后寶誕演戲頒贈紀念品儀式」。呢項慶典除咗歷史悠久，仲收錄咗喺「香港非物質文化遺產資料庫」內。今年三村合辦嘅天后寶誕神功戲會由25/10公演至30/10。大家有興趣嘅不妨趁住秋高氣爽嘅日子嚟一趟石澳，除咗可以欣賞海天一色嘅南區美景外，同時欣賞埋充滿民間特色同傳統中華文化嘅神功戲表演。
以上賀75周年國慶嘅精彩活動固然唔少得各個主辦及合辦單位嘅努力，亦多謝一眾嘉賓到場鼎力支持，包括中聯辦港島工作部人事處處長謝東江、中聯辦港島工作部社工處調研員胡冬潤、全國人大代表朱立威、立法會議員郭偉強、陳學鋒、陳家珮、香港南區各界聯會理事長陳南坡及多名南區區議員等。南區民政處作為各項活動嘅主辦、協辦或支持單位，實在感到好榮幸。
@ 
@