@ 
象棋係傳統對奕棋類遊戲。為咗弘揚呢項中國國粹，中西區推廣使用資訊科技委員會聯同中西區民政處及香港區家長教師會聯會合作，喺10月26日舉辦「AI象棋對奕比賽」，將中國傳統文化同創新科技元素結合。
比賽分為小學、中學及公開組。一眾熱愛象棋嘅小朋友及成年人，齊集堅尼地城社區綜合大樓，同人工智能機械人比拼棋藝。
各組別選出四強後，參賽者互相對奕，一邊爭霸，一邊切磋棋藝。經過一輪激烈比賽後，小學組由李靖烽勝出，中學及公開組由蔡時泓奪標。
頒獎禮上，中西區推廣使用資訊科技委員會主席楊綺、第十四屆中西區區節統籌委員會大會主席周超常及香港區家長教師會聯會秘書長鄭凱珊頒發獎項畀各得獎者，恭賀佢哋獲得殊榮。
比賽當日，大會邀請咗中國香港象棋隊杭州亞運代表鄭彥隆到場同一眾嘉賓及參賽者分享棋藝心得及技巧；更當場同參加者交流棋藝，大家都獲益良多。
