@ 
為慶祝國慶75周年，灣仔民政處同灣仔關愛隊喺9月尾至10月合辦咗5團本地一日遊，由關愛隊隊員及義工們結伴灣仔居民遊覽香港特色景點，齊賀國慶！
各團都以位於灣仔「水上運動及康樂主題區」，由灣仔民政處設置嘅「閃爍燈影耀灣仔」裝置作為起點！呢度裝咗8款共50支復古街燈，充滿昔日香港情懷，配合埋維港海景，絕對係灣仔區不可錯過嘅打卡點 。參加者都先影低靚人靚景，再開展一日嘅行程！仲未去打卡嘅朋友記得同埋親朋好友去打個靚卡呀！
5團本地一日遊各有特色，行程遍布港九新界。有遠離鬧市繁囂嘅行程，包括到訪聞名海外嘅天壇大佛、具濃厚文化氣息嘅大澳水鄉、以及簇擁海天一色嘅黃金海岸等，同大家一齊感受香港特色風貌。有行程安排參加者重溫香港歷史篇章，包括帶參加者到啟德郵輪碼頭。呢度曾經係見證香港歲月嘅啟德國際機場舊址，依家以嶄新面貌繼續為旅客同市民服務。參加者仲去到美荷樓生活館回顧過去，猶如置身昔日香港社區。
透過今次嘅一日遊，參加者可以體驗香港不同地區歷史文化、人文風情，增進對香港嘅歸屬感。多個景點更有賀國慶嘅旗海飄揚，洋溢濃厚歡樂氣氛，大家都樂在其中。旅程完結後仲有國慶75周年福袋送畀大家，希望參加者將呢份心意同慶賀國慶嘅喜悅帶回家同屋企人分享！
早前《施政報告》亦宣布會投放更多資源畀關愛隊，灣仔區關愛隊會竭盡所能繼續凝聚社區力量，積極關心市民需要，用行動令灣仔處處滿是關愛！最後，祝願祖國富強昌盛 ，香港繁榮安定！
