@ 
為慶祝國慶75周年，東區民政處轄下6個分區委員會喺9-10月舉辦咗不同活動，與區內居民同賀國慶。
愛秩序及康城分區會分別喺8/9及22/9於愛秩序灣社區會堂及鰂魚涌社區會堂舉辦迎中秋及賀國慶活動！活動邀請來自不同團體嘅表演，包括中樂、武術、歌唱等，現場觀眾眼界大開。愛秩序分區會嘅活動仲設有攤位遊戲同華服拍照攤位；而康城分區會仲到訪佛教何李寬德耆英康樂中心派發福袋。
北角東及北角西分區會分別喺29/9及 26/10於北角社區會堂🏢舉辦「北角東分區賀國慶懷舊金曲晚會」及「星耀北角賀國慶金曲晚會」！活動中唔單止有歌星藝人為街坊們帶嚟多首金曲，委員更一齊上台獻唱，送上多首勵志歌曲，與眾同樂，共享國慶喜悅。委員們更向街坊親手送上福袋，將祝福同温暖送畀各位街坊朋友。
至於環泰及怡灣分區會亦一連兩個星期六(19/10及26/10)與柴灣區居民同樂，分別舉辦咗慶祝國慶75周年嘅「環泰繽Fun嘉年華」及「怡灣歡聚同樂日」。活動多彩多姿，區內團體鼎力支持，設有賀國慶為題嘅特色攤位。除咗透過遊戲增加居民對祖國嘅歸屬感，各團體亦傾力演出，包括變臉、武術、中國舞、民族舞、太極功夫扇，仲有獻唱經典金曲，節目豐富，氣氛熱鬧。街坊睇得開心，玩得盡興，仲有委員派發嘅福袋同小禮物，真係滿載而歸!
東區6個分區會賀國慶活動都非常精彩，令街坊同小朋友更加認識中華文化和國家，並緊密團結，共同為國家同香港嘅繁榮發展努力。
