@ 
「文化中國．錦綉四川 走進香港專場」日前（1/11）喺紅磡高山劇場新翼完美落幕。表演節目琳瑯滿目 ，包括川劇變臉、雜技芭蕾、木偶表演及藏族歌曲等。活動仲邀請市民親身體驗四川嘅傳統手工藝，例如剪紙、麵塑、糖畫、鼻煙壺內繪同書法等，加深佢哋對四川文化嘅認識同喜愛。
當晚嘅主禮嘉賓星光熠熠，四川省委常委、統戰部部長趙俊民、一行四川省領導、中聯辦九龍工作部副部長祝小東、全國人大常委、立法會議員李慧琼、商務及經濟發展局 CEDB 副局長陳百里、民政總署副署長易志宏、九龍城民政專員蔡敏君、深水埗民政專員黃昕然以及幾位立法會議員都到場支持，場面非常熱鬧 。大家都盛讚活動內容十分豐富，盡興而歸。
另外，同大家分享一個好消息，兩隻熊貓寶寶嚟咗九龍城啊！由即日起至11月10日，高山劇場外會展出由四川自貢工匠精心製作嘅特色綵燈，燈飾巧妙地將四川熊貓同香港紫荊花元素融合，生動地展現兩地文化嘅深厚聯繫，亦代表團圓、和諧同吉祥如意。自貢綵燈有「天下第一燈」嘅美譽，更係國家級非物質文化遺產。大家切勿錯過！
綵燈會喺每日下午五時半至晚上十一時亮燈，大家快啲嚟九龍城高山劇場打卡，探吓兩隻國寶啦！
@ 