灣仔區議會及分區委員會—參觀港燈南丫發電廠

香港首座發電廠其實係座落灣仔，從1890年開始運作，率先點亮香港首批電能嘅街燈，所以香港電力發展同灣仔好有淵源！大家今次參觀嘅南丫發電廠，自1982年起已為香港服務逾40年。

喺港燈安排下，大家一齊參觀咗發電廠嘅中央控制室、今年年初投產嘅天然氣發電機組同埋太陽能發電系統！同時，新一台天然氣發電機組正在興建，對未來取代燃煤作日常發電嘅目標非常重要！透過今次參觀，大家可以近距離接觸到咁巨型嘅發電機同太陽能發電系統。港燈亦設有一套虛擬實境系統，畀大家彷彿置身海中去了解海上液化天然氣接收站嘅運作。議員同委員都把握機會，同港燈代表積極交流意見，希望可以將電力發展資訊帶返去同灣仔居民分享。

今次參觀畀大家了解香港開發能源系統嘅多元發展，當中亦體會到喺研發嘅同時，必須與保育平衡發展嘅重要性。一眾區議員及分區委員都好期待香港日後可以全面起用綠色能源，實現碳中和嘅同時繼續為市民提供穩定及可靠嘅電力供應服務 。