@ 
九龍城民政處日前(2/11)安排咗26位參加九龍城Y-Dragon計劃嘅同學仔參觀中華煤氣喺馬頭角及大埔嘅廠房 ，了解煤氣生產過程及支持可持續發展嘅措施。
第1站去到位於土瓜灣，有超過90年歷史嘅馬頭角煤氣廠，由工程師詳細介紹煤氣廠嘅歷史以及周邊地區嘅發展。Y-Dragon作為九龍城嘅中學生，佢哋聽得特別入神，無諗過每日返學放學都經過嘅「煤氣鼓」原來蘊含悠久嘅歷史，真係獲益良多！
之後佢哋去到位於大埔嘅廠房參觀，由另一位青年工程師接力為Y-Dragon做導賞員，為同學上一課煤氣通識。為咗保護環境，其實煤氣已經唔用「煤」製作，依家製作嘅原材料主要係石腦油、天然氣以及沼氣！學習完基本知識，Y-Dragon就戴上頭盔，實地考察廠房內嘅生產管道同設施，近距離認識煤氣嘅生產過程，仲參觀咗廠內嘅氫氣提取裝置添！呢個裝置可以將煤氣內嘅氫氣抽出，再利用「氫燃料電池」產生電力。呢種綠色生產方法減少碳排放同對化石燃料嘅依賴。大家都對呢種綠色能源充滿好奇同興趣！
參觀完之後，同學仔都認識多咗氫能喺香港嘅發展同應用，大大提升對綠色能源發展嘅認識 ，緊貼世界環保潮流新趨勢！九龍城民政處將繼續同社會各界合作，為年青人舉辦多元化嘅活動，加強年青人對可持續發展嘅認識同關注，共同建設更美好嘅地球環境！
@