@ 
建「機」灣仔 —— 青少年社區設施優化計劃設計比賽暨頒獎禮 已經喺11月2日圓滿結束。設計比賽吸引咗12間學校共60多名同學仔參與，反應熱烈。
今次比賽評審陣容鼎盛，包括有機電工程署署長潘國英、機電工程署氣體及一般法例科助理署長王磊、灣仔民政事務專員張雁伶同埋灣仔區青年發展及公民教育委員會主席郭永亮。學生透過設計思維工作坊、創客空間活動同作品實踐活動，設計出融入機電工程同能源效益概念嘅創新社區設施優化方案，並喺當日呈現設計藍圖同原型作品。
冠軍作品係來自聖保祿學校嘅「電能驛站」，特別為電動輪椅人士而設，充電位具備有太陽能板嘅遮蓋設置，充份運用咗能源效益概念，呢個作品仲同時獲得「最受歡迎作品獎」𠻹！而亞軍作品係來自聖保祿中學嘅「247撐住你」，係一款運用咗創新工程概念兼具備自動消毒功能嘅公共摺椅，節省空間之餘亦都好安全舒適㗎！至於季軍作品係英華女學校嘅「冰融渠清裝置」，作品運用創新嘅融冰裝置去減輕魚腥味道嘅同時，又幫助減輕地板濕滑問題。而聖公會鄧肇堅中學嘅「智安心鞦韆」、嘉諾撒聖方濟各書院嘅「百足生電 一頭霧水」同埋張祝珊英文中學嘅「灣仔站 —— 水深火熱之地」就一同獲得優異獎。透過參加比賽，同學仔除咗可以切身感受到科技應用對改善環境同生活嘅種種可能外，又可以有機會展現對社區嘅關愛同埋責任感，同時更為灣仔社區設施嘅優化提供新嘅啟發。
嚟緊我哋會將同學仔參賽嘅原型作品喺灣仔區公開展出，畀市民一睹佢哋充滿創意同想像力嘅成果，請大家密切留意！
