@ 
南區區議會聯同南區民政處以及地區團體早前推出一系列熊貓主題活動，市民反應熱烈！考慮到2024年《施政報告》同埋4位大熊貓新成員嘅新動向，我哋再次出擊，同各團體一齊籌辦第二輪系列活動，將大熊貓熱潮繼續喺社區散發開去！
11月11日南區區議會會議上，一眾區議員都表示大力支持區議會推動熊貓經濟，為市民同遊客帶嚟歡樂！各位熊貓迷千祈唔好錯過機會，一齊嚟南區打打卡，支持地區經濟！
- 我哋會聯同區內青年一齊精心設計兩幅立體熊貓地畫，於香港仔海濱公園同埋鴨脷洲風之塔公園地下展示；
- 再先後喺南區人流多嘅地點布置熊貓聖誕燈飾、聖誕樹、璀璨嘅霓虹年花、金元寶、熊貓打卡亭等；
- 同時會喺Southside正門外設置大型熊貓藝術裝置；
- 南區兩架熊貓小巴亦會接棒熊貓巴士，於11月下旬起穿梭區內各處；
- 區內特選嘅避雨亭、街道牌、渠蓋、公園等都會以熊貓主題作布置；
- 當然唔少得區內商戶自主研發嘅各款可愛熊貓造型小食，齊齊參與「熊貓熱潮」之餘，仲畀大家大飽口福。
咪住咪住～我哋嚟緊會配合海洋公園大熊貓雙胞胎百日慶，分3場邀請區內中小學生同有需要家庭去睇《再見福寶》熊貓電影。唔講唔知，原來福寶嘅媽媽同我哋嘅盈盈係姊妹，所以福寶係雙胞胎嘅表姐，真係非常有緣份🩵。
以上只係短期內嘅節目預告，未來會有更多精彩嘅熊貓主題活動畀大家一齊參與。大家亦可以留意旅遊發展局嘅旅遊資訊平台Discover Hong Kong嘅「大熊貓專題網頁」，當中會包括南區熊貓特色打卡點，同埋熊貓主題活動嘅最新情報！
