@ 
適逢天文大潮，喺東北季候風 同熱帶氣旋 萬宜嘅共同影響之下，天文台預計大澳嘅水位喺11月18日漲潮時會達到水平面3.3米嘅警戒線 ，低窪地區可能會出現水浸 。
為咗將水浸對居民嘅影響減到最低，離島民政處已啟動「大澳嚴重水浸緊急應變計劃」 ，並聯同關愛隊、天文台、渠務署同其他相關政府部門、大澳鄉事會以及地區團體等，同心合力喺風暴或水浸來臨之前迅速作出準備及應變，包括部門喺大澳河堤同主要街道設置擋水板、喺多個地點放置沙包提供畀居民取用，並透過大澳鄉事會及地區團體發放防水浸信息予居民同商户。11月16日大嶼山關愛隊更聯同地區團體，出動探訪容易受水浸影響嘅大澳棚屋居民，了解佢哋嘅需要 ，同時派送防災物資，呼籲大家做好防洪措施。
11月17日，離島民政處亦聯同關愛隊同地區團體馬不停蹄協助有需要嘅街坊，將雪櫃和其他家具 雜物 升高，以保障 居民生命財產嘅安全。
離島民政處已安排於11月18日晚上設置大澳水浸預警系統及緊急事故協調中心 ，同時開放設於鄉事會及大澳基督教女青年會嘅臨時庇護中心 ，及位於龍田邨嘅臨時收容中心予有需要嘅居民暫避，並會繼續謹守崗位，同其他政府部門及團體保持緊密聯繫，密切留意天氣情况，全力以赴 為有需要嘅居民提供適切嘅協助。
@