@ 
深水埗地區歷史內涵豐富，一齊睇吓過去周末舉行嘅3D深水埗360計劃– 成果分享會及結業禮啦！
「3D深水埗360」計劃嘅學員眨吓眼就完成計劃共三堂嘅課堂，包括由浸大歷史系副教授鄺智文博士主講嘅「空間史研究初探」、到深水埗公共圖書館搜集資料、到訪地理空間實驗室學習使用地理信息系統 (GIS) 。
上周六(16/11)，咁多位學員出席計劃結業禮，分享佢哋依段時間對深水埗嘅觀察，透過故事地圖(Story Map) 展示研究成果。
學員們揀嘅主題都好多元化～其中包括：展示深水埗住屋、交通、飲食、學校嘅歷史變遷等。有隊伍更加識得去政府嘅「空間數據平台」下載公開數據，真係叻叻。見到鄺博士「老懷安慰」，仲送咗好多快餐店餐券畀同學。
好開心睇到同學仔喺研究中運用課堂所學嘅知識同技巧，希望活動可以令大家對深水埗呢個地方有更深入嘅了解，繼續保持探索社區嘅好奇心。
活動由深水埗民政處、深水埗區青年發展及公民教育委員會及香港中華文化促進中心合辦；深水埗民政專員黃昕然、深水埗區青年發展及公民教育委員會主席甄韋喬都有出席支持結業禮。
