@ 
近日，乒乓球港隊代表李皓晴、李清韻，以及香港教育大學健康與體育學系高級講師雷雄德博士，應大埔區撲滅罪行委員會同大埔民政處邀請嚟到大埔東昌街體育館出席「FUN」享正向生活2024活動。幾位嘉賓同來自15間中小學，超過700名學生見面交流，切磋球技，同學仔都好興奮！
活動先由兩位畢業於教大嘅星級球員同雷博士來一場師生對話，分享自己嘅乒乓球心路歷程，同埋喺多年嘅訓練、比賽過程中遇到成敗得失時點樣面對，鼓勵同學仔遇到困難唔好放棄，努力總會見到希望。雷博士同場仲分享「健康四寶」：恆常運動、充足睡眠、均衡飲食同壓力處理，大家都記住喇！
幾位嘉賓嘅分享深刻，同學仔全神貫注，問答環節更加全場舉手爭住提問，非常踴躍！
兩位星級球員跟住即場為大家示範同講解乒乓球技巧，更同主禮嘉賓及來自不同學校嘅30位同學切磋球技，大埔民政專員陳巧敏都獲邀落場一顯身手。有幸近距離觀賞頂尖運動員嘅球技，同學仔都好興奮，現場氣氛熱烈！
@ 