@ 
為咗響應「18區日夜都繽紛」活動，九龍城民政處、九龍城區議會同埋九龍社團聯會九龍城地區委員喺今個月會舉辦「18區日夜都繽紛@寵愛龍城食買玩」系列活動，向市民及旅客推廣九龍城嘅美食、購物同埋娛樂項目，提振地區經濟。
活動嘅第一個亮點，就係喺尋日（1/12）舉辦嘅啟動禮暨嘉年華 ！啟動禮由勞工及福利局 Labour and Welfare Bureau 副局長何啟明、九龍城民政專員蔡敏君、中聯辦九龍工作部處長林金輝、全國人大常委李慧琼立法會議員、港區全國人大代表九龍社團聯會理事長徐莉、香港中國企業協會總裁于曉、九龍城警區指揮官陳少鳴總警司、九龍城區體育會會長廖永通、香港廣西社團總會九龍中分會劉德豐主任同埋提振地區經濟專責工作小組主席兼活動召集人黃文莉區議員一同主禮。啟動禮上仲有各式各樣嘅才藝表演同劍擊示範賽，一眾嘉賓同街坊都睇得開心又興奮。而嘉年華就有多元化嘅遊戲攤位，向參加者宣揚少數族裔文化同埋推廣體育運動。
當晚嘅壓軸表演就係九龍城區上空首次進行嘅無人機表演。由500部無人機喺夜空展示九龍城眾多特色，包括代表九龍城區嘅龍形公仔、啟德舊機場、宋皇臺、九龍城寨等；仲有熊貓運動員呈現明年香港承辦嘅8個全運會項目，包括手球、場地單車、劍擊、排球同七人欖球等嘅靚靚圖案。現場氣氛相當熱鬧，大人同小朋友都睇得好開心同滿足！
12月期間亦會有九龍城商戶優惠計劃，只要向特約商戶出示活動嘅網頁，就可以享受好多美食同購物服務嘅Jetso。另外，嚟緊幾個周末，九龍城區仲會有「劍擊體驗運動日」（14/12）同「寵物市集暨寵運會」（22/12)）等等嘅活動畀大家參加，喺鼓勵大家多做運動嘅同時帶出人寵共融嘅訊息！大家記得多啲嚟九龍城嚟食、買、玩呀！
@