@ 
政務司司長Eric Chan 陳國基同民政及青年事務局 Home and Youth Affairs Bureau局長麥美娟昨日（3/12）嚟到九龍城區嘅DREAM少數族裔人士支援服務中心主持開幕典禮。
陳國基喺開幕典禮致辭時表示，政府一向十分重視為少數族裔人士提供支援。為加強支援少數族裔人士嘅服務，並協助佢哋融入社區，行政長官喺2023年《施政報告》入面宣布，2024年會喺新界東及九龍中設立兩間新嘅支援服務中心，令全港少數族裔人士支援服務中心增至10間。
陳國基表示，繼增加支援服務中心嘅數目後，《行政長官2024年施政報告》公布咗政府將會喺明年邀請多一間現有嘅支援服務中心，連同現有嘅融匯中心，為少數族裔人士提供傳譯及翻譯服務，以減輕佢哋因言語不通而帶來嘅不便。佢期望呢啲新措施可進一步促進少數族裔融入社會。
現有嘅8間少數族裔人士支援服務中心分別設於灣仔、觀塘、屯門、元朗、油尖旺、深水埗、東涌同葵青，新增嘅2間則位於九龍城同沙田（設於沙田嘅中心會喺今個月下旬正式開幕）。DREAM中心位於九龍城賈炳達道128號九龍城廣場五樓501號鋪，由香港國際社會服務社負責營運，為少數族裔人士提供一系列嘅支援服務，包括語文班、興趣班、課後輔導班、青少年活動、融和活動，以及輔導同轉介服務。此外，中心亦會協助少數族裔人士使用公共服務，包括設置互聯網工作站供瀏覽網上資訊，同埋派發多種語言嘅服務指南及單張，提供有關政府同非牟利機構服務嘅資訊。
DREAM中心所設立的一支少數族裔關愛隊亦已同時投入服務啦！
@ 