@ 
為進一步加深市民大眾對中西區嘅認識，繼早前舉行嘅中西區文學徑及舊精神病院立面兩個導賞團外，中西區民政處亦安排咗「摩星嶺要塞古蹟徑導賞團」，第一團已經喺23/11舉行。
摩星嶺係香港島西面嘅一座小山，過去曾經係軍事要塞地點，負責保護香港島西面海域。現存遺蹟包括炮台、瞭望台、營房及士兵操場等，其中摩星嶺炮台更於2009年被評為二級歷史建築！除咗歷史遺蹟，摩星嶺亦座擁香港西面壯觀嘅海景。
參加者跟隨導賞員遊走各個遺蹟景點，了解相關嘅歷史同軍事知識。沿途亦有民政處設立嘅資訊牌，提供更多要塞古蹟嘅歷史資訊。摩星嶺獨特嘅遺蹟同自然風光都令到大家樂而忘返！
