@ 
大家期待已久嘅大熊貓安安、可可終於隆重登場，由8/12起喺香港海洋公園同大家見面！呢2位超可愛嘅國寶級大明星一出場就引嚟歡呼同掌聲。見到安安同可可精神奕奕，已經完全適應香港嘅環境，大家都好開心！
7/12，行政長官李家超 John KC Lee、國務院港澳辦常務副主任周霽、國家林業及草原局副局長李雲卿、中聯辦主任鄭雁雄、政務司副司長卓永興、文化體育及旅遊局 Culture, Sports and Tourism Bureau局長羅淑佩、海洋公園公司董事局主席龐建貽等一眾主禮嘉賓主持海洋公園嘅「大熊貓亮相儀式」，南區民政專員Francis亦有幸獲邀出席，共同見證2位大熊貓明星登場。
喺南區民政處嘅引薦下，聖保羅書院小學男合唱團上台領唱國歌，而聖文嘉中英文幼稚園嘅學生就以可愛造型表演自創熊貓舞，為典禮增添歡樂氣氛。
大熊貓安安同可可嘅到來，唔只代表中央政府對香港嘅關懷同推動熊貓保育工作嘅肯定，嚟緊佢哋仲會擔當「香港旅遊大使」嘅角色，吸引世界各地旅客訪港，為香港繼續注入活力！
今日嘅亮相儀式只係開端，熊貓熱潮將會席捲全南區！嚟緊12月中，南區嘅「繽紛熊貓節日巡禮」就會開始，避風塘兩旁同赤柱會布滿富節日氣氛嘅熊貓裝置同燈飾；大家亦都可以搵到由南區文藝青年自創嘅3D錯視藝術地畫，同可愛熊貓嚟個時空互動；南區嘅特選街道同小巴都會加入熊貓主題布置。仲有，坐落香港仔嘅大記糕點7-8/12都有熊貓糕點🍰優惠，慶祝安安同可可正式同公眾見面。大家千祈唔好錯過喇！
講到食，嚟南區當然要試吓地道嘅艇仔粉啦！專員同一眾立法會議員日前出席咗香港仔流記艇仔粉嘅開幕禮同義賣活動，活動期間賣艇仔粉嘅收入扣除成本後會全數捐畀香港仔坊會同鴨脷洲街坊學校。為咗配合南區處處有熊貓2.0，艇仔粉仲安排咗隻巨型大熊貓趴喺船上面，嘉賓都大讚可愛，不停「打卡」！
