@ 
葵青民政處聯同葵涌西分區委員會日前（1/12）喺大窩口邨下山廣場舉辦「冬日繽FUN@葵涌西嘉年華」 ！喺民政事務總署社區參與計劃撥款嘅支持下，街坊們齊聚一堂，共度一個充滿驚喜同歡樂嘅日子！
今次嘉年華係疫情後分區會首個大型活動，大家都充滿期待！ 當日活動內容非常豐富，除咗有雜技、魔術同小丑表演 ，仲邀請到12間來自不同學校及機構嘅表演團隊呈獻共16項精彩節目 ，包括舞獅 、歌舞 、花式跳繩、健康操等，適合各年齡層觀眾！
嘉年華仲設有6個由團體及學校提供嘅特色攤位遊戲 ，更有手工攤位、棉花糖 同扭波波攤位 ，各位小朋友玩得不亦樂乎！
影相區亦成為當日熱點 ，眾多嘉賓同市民都有拍照留念，留下無數美好回憶！ 當日氣氛熱烈，小朋友同大朋友笑聲不斷，掌聲不絕 ，令到呢個冬日倍感溫暖！
特別鳴謝17個參與團體及學校，仲有每位參加者嘅全力支持 ，葵涌西分區委員會將繼續推動更多精彩活動，鼓勵居民積極參與！
