@ 
最近天朗氣清，涼風送爽，最啱玩戶外活動！中西區民政處同中西區青年網絡喺12月1日合辦「運動達人體驗館」活動，鼓勵青少年勇於踏出舒適圈，挑戰唔同難度嘅運動項目，建立自信。
一班年青人先喺團隊建設遊戲中熱吓身、互相認識，然後體驗糅合電競同運動元素嘅AR閃避球，再挑戰考驗體能同膽量嘅戶外繩網陣同埋運動攀登。過程中，大家都玩得好投入，發揮解難能力同團隊合作精神，例如玩AR閃避球時齊齊商量戰術、挑戰戶外繩網陣時同隊友互相扶持、運動攀登時奮力朝住目標進發。參加者合力完成各項挑戰，除咗有滿足感，經過一日相處，更收穫寶貴嘅友誼。
中西區民政處同中西區青年網絡會繼續喺社區推廣運動風氣，鼓勵市民及青年人多做運動，享受運動帶來嘅樂趣。
