@ 
講故事係人類天性。講好故事對推動旅遊、職場解難、以至學習分享都好有用。如果識得用埋數據，更可增加說服力。而故事地圖story map正正係結合兩種技巧嘅好工具 。
日前（14/12），深水埗學校聯絡委員會主辦嘅故事地圖大賽評審及頒獎禮已圓滿結束。
今次比賽有近60位 ，共16隊嚟自中、小學嘅學生參加。佢哋透過多場簡介會同空間數據工作坊，增加咗唔少數據應用範疇嘅知識；透過社區研究考察訪問，亦發掘咗唔少深水埗區嘅珍貴面貌同埋歷史轉變。佢哋除咗要向評審講解精心製作嘅故事地圖，仲要接受提問。計我深Duck話，好多大學生都未必學過story map，所以同學仔真係犀利。
恭喜寶血會上智英文書院及中華基督教會協和小學（長沙灣）分別勇奪中學組及小學組冠軍！
評審對同學讚不絕口，好欣賞佢哋以獨特嘅角度呈現深水埗嘅歷史建築、傳統店舖、房屋發展以及多元文化面貌及變遷，充份展現參賽同學嘅熱誠同創意。深水埗民政專員黃昕然更親身試吓以story map同大家分享深水埗嘅故事。
活動由深水埗學校聯絡委員會、GIS Academy合辦，深水埗民政處協辦及贊助。感謝香港大學城市規劃與設計系客席副教授鄧兆星、嶺南大學科學教研組副教授王沛欣、香港教育大學科學與環境學系副教授李偉展、香港浸會大學歷史系副教授鄺智文及教育局總學校發展主任薛兆枝撥冗擔任評審工作。
