@ 
聽到火警鐘響起，你應該點做？
東區防火委員會聯同東區民政處、香港消防處喺10-12月期間，為區內多個屋苑及大廈舉辦咗一連串「火警演習及防火講座」活動，派發防火宣傳單張同精美紀念品，宣傳防火信息，提升街坊嘅防火安全意識 ！
消防員到場講解火警成因、逃生要訣，救人自救嘅方法，又即場示範如何正確使用滅火筒、滅火氈同消防喉轆，以及介紹「防火三寶」同推廣喺家居安裝獨立火警偵測器，提升家居防火安全。火警演習及防火講座內容實用又貼地，吸引唔少住戶踴躍參加，大家熟習咗大廈嘅逃生路線，萬一不幸遇上火警，都可以冷靜迅速應對，務求安全離開大廈。
東區民政處同東區防火委員會將繼續舉辦各類型防火活動，加強防火宣傳及推廣工作，進一步提升區內居民嘅防火意識。
