@ 
1. 智樂通培訓課程：電子社交媒體
電子社交媒體越來越多元化，而且推陳出新。為咗讓中西區居民對各類電子社交媒體有進一步認識，中西區民政處聯同中西區推廣使用資訊科技委員會喺日前(14/12)舉行講座，吸引近150名參加者，當中更有唔少老友記出席。
主講嘉賓以生動及深入淺出嘅方式，向大家示範多種電子社交媒體嘅操作方法，以及講解運用時嘅注意事項；更提醒佢哋如何防止墮入電子社交媒體嘅詐騙陷阱。
有老友記喺活動後表示，已即時開通咗社交平台帳號，瀏覽孫仔同好友嘅帖子。
另外，仲印製咗一本小冊子分發畀區內居民，希望將善用電子社交媒體嘅訊息廣泛地宣揚出去！
2. 中西區兒童舞蹈團周年匯演
中西區文化藝術協會轄下嘅中西區兒童舞蹈團，多年來培育唔少熱愛舞蹈嘅小朋友，而每年一度嘅周年匯演，係一個畀學員充分展現努力練習成果嘅機會。由中西區民政處及中西區文化藝術協會合辦嘅2024年周年匯演，早前(15/12)喺上環文娛中心劇院上演日夜兩場。陸恩美團長喺典禮上，感謝家長支持及鼓勵子女透過學習舞蹈認識中華文化。
一眾穿著顏色鮮豔民族舞服嘅學員傾力演出大型舞蹈「愛我中華」及十多隻精心編排嘅中國民族舞蹈。為咗促進交流，今次匯演亦邀請咗嘉諾撒聖家書院嘅同學參與演出。
整場匯演贏得觀眾嘅熱烈掌聲，成功展現中西區兒童舞蹈團嘅藝術魅力及學員努力嘅成果。
