@ 
沙田民政專員余懷誠18/12聯同一眾沙田區議員及增選委員，前往渠務署「搬遷沙田污水處理廠往岩洞」工程計劃嘅岩洞工地同社區聯絡中心實地考察 ，了解工程嘅範圍、進度同創新技術嘅應用。
大家先到社區聯絡中心，聽取渠務署代表簡介工程範圍同進度。將沙田污水處理廠遷往岩洞，可以改善現址同周邊環境，同時可騰出約28公頃土地，改作其他更具效益嘅用途。
大家隨後進入岩洞工地 視察地盤所使用嘅創新科技，包括4S安全智慧工地系統 、智能化鑿岩台車 ，以及HoloLens混合虛擬實境眼鏡 等。知悉工程團隊喺工地應用多項創新技術，有助加快工程進度、提高工程質量控制同提升工地安全。大家都對有關技術有更深入嘅了解，明白工程團隊如何克服困難同挑戰 ，做好呢個岩洞工程，同時減低工程對社區嘅影響。
呢次考察岩洞工地係非常難得嘅交流機會，沙田區議會會繼續積極同渠務署及地區有關持份者作溝通，共同推進有利民生嘅工程項目！
