@ 
為更深入了解消防處喺滅火 、救援、防火同緊急救護服務等各方面嘅工作，消防處特別喺上星期五(13/12)為葵青區防火委員會一眾委員安排咗「參觀消防及救護學院」活動 。葵青民政專員鄧顯權都有一齊參與，支持消防處嘅防火教育工作。
今次嘅參觀行程豐富，除咗有火警逃生講座、心肺復甦訓練、專隊訓練、水上事故急流救援 ，更加有模擬鐵路站發生火警嘅實火示範！ 消防處特別派員 向委員提供詳盡嘅講解同教學，仲帶大家參觀學院入面唔同嘅訓練場地 ，包括高空拯救 、坍塌搜救、模擬飛機事故 及交通事故救援。 一眾委員有機會目睹消防員認真嘅操練，大讚佢哋專業同專注！大家更同火警調查犬Goose 見面，Goose醒目靈敏，即場為大家示範點樣迅速搜尋助燃物。
最後，專員同一眾委員參觀咗消防及救護教育中心暨博物館，了解消防處150多年嘅歷史、文化同發展，就好似行咗入時光隧道 。館內展出多部消防車及救護車 ，每一部都有獨特之處。
葵青區防火委員會十分感謝香港消防處同消防及救護學院精心安排今次嘅參觀 ，未來葵青民政處、葵青區防火委員會以及消防處會繼續攜手合作 ，舉辦更多防火宣傳活動 ，加強區內市民嘅防火意識。
藉此向大家呼籲，消防處正推出「消防處社區應急先鋒計劃」 ，招募巿民接受防火、應急，以及施行心肺復甦法和使用自動心臟除顫器嘅訓練，裝備佢哋成為社區安全嘅守護者 ，有興趣嘅市民請踴躍參加！
