@ 
平時搭飛機，有無諗過國泰航空嘅總部—國泰城係點樣嘅呢？ 葵青民政專員鄧顯權11月20日帶住4間葵青區中學嘅16位學生，一齊參觀國泰城，踏上咗一場有十個趣嘅航空之旅！
航空業內幕大公開
去到國泰城，國泰航空嘅企業事務部同策略關係拓展部嘅專業團隊超熱情，向同學仔分享航空公司日常運作嘅秘辛！ 大家唔係淨係聽講解咁簡單，仲有得親身試！ 同學仔試玩咗模擬飛行器，有機會扮機長，個個都忍唔住影相「打卡」 。除咗模擬駕駛，同學仲參觀咗安全訓練設施，入埋模擬客艙同埋員工休息區，真實咁感受到航空員嘅工作環境，真係好難得！
小組滙報大比拼
活動尾聲，大家進行咗精彩嘅小組分享環節。表現最優秀嘅組別由幾位評審一齊揀出，包括葵青民政專員鄧顯權、葵青區青年發展及公民教育委員會主席陳藹怡、荃灣葵涌及青衣區中學校長會主席黃定康，仲有香港工商總會—青年網絡副主席劉剛。每組表現都好出色，真係好難抉擇！
專員勉勵：探索香港航空業未來
專員即場分享咗佢對航空業嘅睇法，指出航空公司喺國家發展戰略中擔當住重要角色，而香港國際機場憑住獨特嘅綜合優勢 ，結合客運、客戶服務同埋提升貨運能力嘅三跑道，行高增值路線，全力引領香港未來發展，令人對未來充滿信心！
青年未來，由呢度起飛！
今次參觀活動令同學開闊眼界，對航空業未來充滿憧憬！ 為咗幫助更多青年規劃未來，我哋會繼續舉辦唔同行業嘅參觀同生涯規劃活動，等大家可以發掘自己嘅興趣同潛能，認識更多行業！
活動由葵青民政處、葵青區青年發展及公民教育委員會、香港工商總會青年網絡主辦、並由荃灣葵涌及青衣區中學校長會係活動中擔任支持單位。
@ 