@ 
作為南區重要地標，香港仔避風塘除咗見證香港開埠以嚟嘅歷史，亦帶領區內漁業同旅遊發展。為咗畀大家重溫本港昔日四大漁村之首嘅風貌，我哋舉辦咗舊相徵集活動，收到唔同地區人士所提供嘅珍貴照片。經過精心整理同設計，根據唔同主題喺香港仔海濱公園嘅展覽亭展出當中嘅精選珍藏，畀市民同遊客都可以認識到香港仔避風塘嘅歷史故事。
12月28日南區民政專員兼區議會主席鄭港涌聯同躍動港島南辦事處總監區潔英、南區青年社區建設委員會主席陳文俊，以及一眾主禮嘉賓為照片展揭幕。大家都寄望展覽亭成為南區特色新地標，畀更多人感受到南區獨特之美。同場亦設攤位活動，除咗唔同嘅魚仔手工藝製作，仲有大熱嘅熊貓板畫，相當吸睛。
喺香港仔海濱展覽亭欣賞完避風塘今昔風貌後，記得唔好錯過門外各款大熊貓布置，同得意大熊貓打個卡再繼續暢遊南區啊！
