@ 
屯門區公民教育青年領袖培訓計劃轉眼就嚟到第4課，屯門民政助理專員同屯門區青年發展及公民教育委員會委員，30/12同一班青年學員去咗參觀喺11月底開幕嘅龍鼓灘屯門滅火輪消防局，一齊同駐守滅火輪嘅消防人員交流。消防員向學員講解各類消防設備喺救援行動時嘅作用，又分享咗消防員嘅日常工作，以及介紹消防處喺公眾教育、應急教育及宣傳等方面嘅資訊，今次嘅參觀活動為學員提供咗一個寶貴嘅交流同學習體驗，增進佢哋對消防處喺海上救援工作嘅認識。
經過之前嘅3個課堂，學員對社會嘅觸覺同分析能力都有所提升，亦對香港特區政府架構、立法會及區議會嘅職能，以及部門嘅日常工作有更深入了解。佢哋而家已經積極準備緊喺2025年2月18日舉行嘅模擬區議會會議，扮演區議員向區議會主席就影響屯門地區事務及管理提供意見，設身處地學習參與地區服務！
