@ 
粵劇係中國傳統文化嘅藝術瑰寶，喺2009年列入人類非物質文化遺產名錄。東區民政處一直不遺餘力喺區內大力推廣及支持粵劇文化嘅發展。
「睇大戲，去新光」相信唔少人都聽過。新光戲院大劇場唔止係北角嘅文化地標，亦係唔少香港人嘅集體回憶。因此，東區民政處聯同東區區議會喺2024/25年度東區文化節舉辦「戲寶璀燦 粵韻東區」一系列精彩活動，包括粵劇晚會、粵劇工作坊、粵劇分享會、以及新光開放日，為觀眾提供藝術享受之餘，亦加深大家對粵劇文化嘅認識。好多參加者都係第一次到新光後台參觀，第一次聽粵劇嘅趣聞軼事，個個都話好難忘。活動期間，北角附近約60間商舖仲提供飲食及零售優惠，一齊「日夜都繽紛」。
咁好嘅場地當然好好善用啦！喺去年度文化節，東區民政處亦舉辦咗「中國戲曲節」，當中包括粵劇、潮劇、瓊劇及高甲戲。8場表演，座無虛席，叫好又叫座。
粵劇晚會更係每年東區慶回歸賀國慶嘅重點項目，關愛隊陪同老友記去新光一齊睇大戲，真係好窩心㗎。此外，東區每年嘅譚公誕亦有一連幾日嘅粵劇神功戲，積極推廣粵劇文化。
東區民政處一直撥款支持「東區文藝協進會」推廣粵劇文化，例如成立「東區青少年兒童粵劇團」，定期提供訓練。小朋友年紀雖少，但個個功架十足，每次表演都贏盡掌聲。
東區民政處會一如以往，繼續喺區內與不同團體合力推廣及支持這珍貴嘅本土藝術文化。
@