@ 
一講到啟德，好多人都會諗起去體育園睇波、去大型商場行街，或者帶毛孩去車站廣場放電。而家大家仲可以去新落成嘅旅遊消閒好去處——啟德橋東面嘅啟德共融通道，踩住單車享受優美嘅啟德海濱！
為響應2025年由粵港澳三地共同舉辦嘅第15屆全國運動會 ，並向市民宣傳共融通道，九龍城民政處、九龍城區議會、土木工程拓展署同埋香港兒童鼓樂團上星期六（4/1）喺啟德共融通道舉行咗「鼓樂單車賀新春2025」。一眾嘉賓同埋街坊透過鼓樂、舞蹈同踩單車一齊迎接新春 。當日典禮有5位嚟自香港泰僑協會嘅舞者為大家帶嚟精彩嘅舞蹈表演 ，然後有10位嚟自香港兒童鼓樂團，精靈又可愛嘅小朋友 為大家擊鼓奏樂。在場各位嘉賓都睇到拍爛手掌，為精彩嘅表演歡呼喝采 。
九龍城民政專員蔡敏君、全國人大常委、立法會議員李慧琼、九龍社團聯會九龍城地區委員會主席、立法會議員楊永杰、九龍城區議會社區參與及文化康樂委員會主席丁健華，同土木工程拓展署東拓展處處長梁中立及一眾嘉賓當日將心意寫喺許願卡，然後掛喺許願樹上 ，為九龍城同香港獻上新春祝福 。
當日好多嘉賓同市民踩住單車，暢遊啟德共融通道 ，一邊享受海風同美景，一邊做運動強身健體 ！
由即日起至16/2，啟德橋東面嘅啟德共融通道都備有心意卡畀各位市民寫低心願 。歡迎大家一齊去啟德共融通道，親自掛上新年祈願，迎接幸福感滿滿嘅新年 。鍾意運動嘅朋友不妨帶埋單車，嚟共融通道舒展身心，欣賞啟德海濱嘅美麗景色 。喺度同大家拜個早年！祝大家蛇年行大運 、身體健康、龍馬精神 。
@ 