唔知大家開始整理屋企辦年貨未呢?未嘅話,嚟深水埗辦年貨就最啱喇。

送龍迎蛇 ,今個星期深水埗各政府部門,分別喺北河街街市(6/1)、仁愛堂美孚鄰舍活動中心附近空地(8/1)及保安道街市(9/1)發起一年一度地區管理委員會跨部門「深水埗區歲晚大掃除」。深duck記者當然即刻出動為大家直擊報道 !

尋日(9/1)深水埗民政專員黃昕然、食環署深水埗區環境衞生總監黃偉能多個政府部門代表及多名深水埗區議員一齊去咗長沙灣保安道市政大廈附近嘅大街小巷視察環境,跟進順寧道一帶街道衞生、路面雜物 同埋建築廢料嘅最新情況。

深duck見到佢哋又同市民交流,派發宣傳單張同賀年福袋,呼籲大家注重環境衞生,一齊將深水埗區打掃得更加清潔乾淨。清潔龍阿德 都有到場支持呀,深Duck同街坊都有同佢打招呼

蛇年將至,深水埗區內各大政府部門轄下嘅場地,包括公眾街市、遊樂場、公園、社區會堂等,都會加大清潔力度,等大家可以一齊乾乾淨淨喜迎蛇年!民政處會繼續協調統籌跨部門聯合清理行動,環保署同運輸署等都會加強巡查,減少各種滋擾。

深水埗民政專員黃昕然表示希望凝聚各方力量,鼓勵市民積極響應「歲晚大掃除」,由家居清潔做起,為保持社區環境衞生出一分力。

深duck仔都有落手落腳參加大掃除,你都要一齊呀!

發佈留言

您無須註冊,只需要提供電郵地址即可發表留言,您提供的電郵地址不會公開。 必填欄位標示為 *